Ghulam Rabbani Taban
rahguzar ho ya musafir niind jis ko aa.e hai
gard ki maili si chadar oḌh ke so jaa.e hai
qurbaten hi qurbaten hain duriyan hi duriyan
aarzu jaadu ke sahra men mujhe dauḌaye hai
vaqt ke hathon zamir-e-shahr bhi maara gaya
rafta rafta mauj-e-ḳhun sar se guzarti jaa.e hai
meri ashufta-sari vaj.h-e-shanasa.i hui
mujh se milne roz koi hadisa aa jaa.e hai
yuun to ik harf-e-tasalli bhi baḌi shai hai magar
aisa lagta hai vafa be-abru ho jaa.e hai
zindagi ki talḳhiyan deti hain ḳhvabon ko janam
tishnagi sahra men dariya ka saman dikhla.e hai
kis tarah dast-e-hunar men bolne lagte hain rang
madrase valon ko ‘taban’ kaun samjha paa.e hai
Leave a Reply