Nazeer Qaisar
galiyan udaas khiḌkiyan chup dar khule hue
ukta gaya huun main to ye sab dekhte hue
hathon pe likh ke chumta rahta huun us ka naam
muddat guzar ga.i hai jise ḳhat likhe hue
ḳhushbu-o-rang ab-o-hava saz-o-ḳhamushi
kya qafile hain dasht-e-ḳhala men ruke hue
kuchh puchhti hain peḌon ki sarsabz Tahniyan
kuchh kah rahe hain raah men patte gire hue
hathon men le ke chalta huun ankhon ki mish.alen
har samt hain fazaon men chehre bane hue
muhtaj-e-abr-o-bad hue ahl-e-ḳhak-dan
har chand is zamin men the dariya chhupe hue
ai mavara-e-fikr ab avaz de ki ham
ḳhud se bichhaḌ ga.e hain tujhe DhunDte hue
Leave a Reply