Anjum Usman
sa.at-e-zer-o-zabar ke darmiyan koi to hai
sun pas-e-idrak pesh-e-asman koi to hai
main ḳhud apne baab men rahti huun mahv-e-justuju
ham-rikab-e-vahshat-e-reg-e-ravan koi to hai
ajnabi hain saari avazen sara-e-dahr men
phir bhi yuun lagta hai mera ham-zaban koi to hai
hain sabhi banjar ḳhayal-o-ḳhvab ki zeba.iyan
haan bas itna hai ki zeb-e-dastan koi to hai
raqs farma.en ragon men ishq ki chingariyan
kah uThe ya.ani talab sho.ala-ba-jan koi to hai
be-sutun aflak be-buniyad raqsan hai zamin
thaam rakkha hai kisi ne ye jahan koi to hai
ek naqsh-e-yad-e-yar ik partav-e-husn-e-fareb
meri bazm-ara.iyon ka raz-dan koi to hai
bar-sar-e-hijran bhi vabasta hai ummid-e-visal
ham sa shahr-e-arzu men ḳhush-guman koi to hai
rah-navard-e-ishq hai gham ashna-e-iztirab
is dayar-e-justuju men zau-fishan koi to hai
vus.aten ‘anjum’ faromanda hain jis ke baab men
mavara-e-kul makan-o-la-makan koi to hai
Leave a Reply