yadon ka shahr-e-dil men charaghan nahin raha
kya koi gham hi sho.ala-ba-daman nahin raha
ab e’tiraf-e-ahd-e-vafa kar rahe hain vo
jab e.atibar-e-umr-e-gurezan nahin raha
nikle kuchh aur abla-pa.i ki ab sabil
sahra men koi ḳhar-e-mughilan nahin raha
baḳhiya-gari-e-dil ke tasavvur men gum hue
goya ḳhayal-e-jumbish-e-mizhgan nahin raha
ye soch kar ki ḳhugar-e-gham ho na ja.un main
vo sargiran hua sitam arzan nahin raha
azar-e-hijr apni jagah mustaqil magar
dil mujh se tere qurb ka ḳhvahan nahin raha
yad-e-ḳhuda hi ka.aba-e-dil men basa.iye
ab ek but bhi dushman-e-iman nahin raha
imkan-e-vasl-e-yar to ‘aḳhgar’ kabhi na tha
azar-e-hijr-e-yar ka arman nahin raha
Leave a Reply