ghar men chizen baḌh rahi hain zindagi kam ho rahi hai
dhire dhire ghar ki apni raushni kam ho rahi hai
shahr ke bazar ki raunaq men dil bujhne lage hain
ḳhuub ḳhush hone ki ḳhvahish men ḳhushi kam ho rahi hai
ab kisi ko bhi chhuo lagta hai pahle se chhua sa
vo jo thi pahle-pahal ki sansani kam ho rahi hai
tai-shuda lafzon men karte hain ham iz.har-e-mohabbat
ab to pahle ishq men bhi an-kahi kam ho rahi hai
le gaya ye shahr us ko mere pahlu se uTha kar
mujh ko lagta hai miri divangi kam ho rahi hai
husn ka bazar aana jaana bhi kuchh baḌh raha hai
kuchh miri ankhon ki bhi pakizgi kam ho rahi hai
vaqt DanDi marta hai tolne men mera hissa
din bhi chhoTe paḌ rahe hain raat bhi kam ho rahi hai
shahr ki koshish ki ḳhud ko aur pechida bana le
meri ye tashvish meri sadgi kam ho rahi hai
sahilon ki bastiyan ye dekh kar ḳhamosh kyuun hain
bastiyon ke phailne se hi nadi kam ho rahi hai
shaam aate hi tumhen rahti hai ghar jaane ki jaldi
‘farhat-ehsas’ in dinon avargi kam ho rahi hai
Leave a Reply