Yasmeen Hameed
mujhe agahi ka nishan samajh ke mitao mat
ye charagh jalne laga hai is ko bujhao mat
mujhe jagna hai tamam umr isi tarah
mujhe subh-o-sham ke silsile men milao mat
mujhe ilm hai mire khal-o-khad men kami hai kya
mujhe aaine ka tilism koi dikhao mat
main khulus-e-dil ki bulandiyon ke safar pe huun
mujhe dastan-e-fareb koi sunao mat
mujhe dekh lene do subh-e-farda ki raushni
miri aankh se abhi haath apna hatao mat
vahi ped hai vahi shakh hai vahi naam hai
jo gira hai phuul yahan se us ko uthao mat
mujhe tah men ja ke uchhalne hain guhar kai
main huun mutmain mujhe dubne se bachao mat
tumhen be-maqam rafaqaton ki talash hai
mira shahr shahr-e-sabat hai yahan aao mat
Leave a Reply