Yazdani Jalandhari
ik ḳhushi ke liye hain kitne gham
mubtala-e-sad-arzu hain ham
dil bhi lauh-o-qalam ka ham-sar hai
dastanen hain kitni dil pe raqam
azmat-e-raftagan hai nazron men
apne maazi ko DhunDte hain ham
paara paara hai ḳhud junun lekin
fikr-e-insan isi se hai mohkam
bhigi bhigi hai har kiran un ki
hai sitaron ki aankh bhi pur-nam
yuun na hoti sahar ki rusva.i
kaash khulta na raushni ka bharam
ham hain aur ehtiram-e-husn-e-vafa
vo hain aur ehtimam-e-mashq-e-sitam
kamtar us ko na kahiye ‘yazdani’
aadmi ḳhud hai jan-e-do-alam
Leave a Reply