Shams Fareedi
qafile ko bhaTak hi jaana hai
raste men ghubar itna hai
phir ghani raat men ujala hai
dil men raushan vo chand chehra hai
ḳhar-zaron men jism uljha hai
ḳhushk ankhon men ek sahra hai
log aate hain aur jaate hain
jaise duniya sara.e-ḳhana hai
ḳhamushi karb hai samundar ka
tah men tufan uThta rahta hai
chiḳhta rahta hai nagar saara
kaun avaz kis ki sunta hai
bhuul jaane ke ba.ad bhi aksar
mere dil men vo sair karta hai
shams’ pyasa hai aabju ke liye
sahra sahra bhaTakta rahta hai
Leave a Reply