Qafile Ko bhaTak Hi Jaana Hai

qāfile ko bhaTak hī jaanā hai

rāste meñ ġhubār itnā hai

phir ghanī raat meñ ujālā hai

dil meñ raushan vo chāñd chehra hai

ḳhār-zāroñ meñ jism uljhā hai

ḳhushk āñkhoñ meñ ek sahrā hai

log aate haiñ aur jaate haiñ

jaise duniyā sarā.e-ḳhāna hai

ḳhāmushī karb hai samundar kā

tah meñ tūfān uThtā rahtā hai

chīḳhtā rahtā hai nagar saarā

kaun āvāz kis kī suntā hai

bhuul jaane ke ba.ad bhī aksar

mere dil meñ vo sair kartā hai

shams’ pyāsā hai aabjū ke liye

sahrā sahrā bhaTaktā rahtā hai

Leave a Comment