Poet
khuli jo aankh to sadiyon ka fasla nikla
mire vajud men ik shaḳhs dusra nikla
ajab na tha mujhe sahra ki dhuup kha jaati
qadam baḌha.e junun ne to rasta nikla
ḳhabar nahin ki vo ashob-e-vaqt kaisa tha
har ek aankh men barson ka ratjaga nikla
firaq-e-sub.h men vo aankh jal rahi thi magar
bujha hua dar-e-hijran pe ik diya nikla
ghazab ki aag dahakne lagi hai sinon men
ye kaun dhuup men le kar ke aa.ina nikla
har ek phuul ne jhuk kar tujhe salami di
jo sehn-e-gul men kabhi tera tazkira nikla
palak jhapakte hi duniya badal ga.i ‘saghar’
ki mera saaya bhi mujh se gurez-pa nikla
Leave a Reply