Wo Baat Baat Pe Ji Bhar Ke Bolne Wala

vo baat baat pe jī bhar ke bolne vaalā

ulajh ke rah gayā Dorī ko kholne vaalā

lo saare shahr ke patthar sameT laa.e haiñ ham

kahāñ hai ham ko shab o roz taulne vaalā

hamārā dil ki samundar thā us ne dekh liyā

bahut udaas huā zahr gholne vaalā

kisī kī mauj-e-farāvāñ se khā gayā kyā maat

vo ik nazar meñ diloñ ko TaTolne vaalā

vo aaj phir yahī dohrā ke chal diyā ‘bānī’

maiñ bhuul ke nahīñ ab tujh se bolne vaalā

Leave a Comment