Main Ro Ke Aah Karunga Jahan Rahe Na Rahe

main ro ke aah karunga jahan rahe na rahe

zamin rahe na rahe asman rahe na rahe

rahe vo jan-e-jahan ye jahan rahe na rahe

makin ki ḳhair ho ya rab makan rahe na rahe

abhi mazar par ahbab fatiha padh len

phir is qadar bhi hamara nishan rahe na rahe

ḳhuda ke vaste kalma buton ka padh zahid

phir iḳhtiyar men ghafil zaban rahe na rahe

ḳhizan to ḳhair se guzri chaman men bulbul ki

bahar aai hai ab ashiyan rahe na rahe

chala to huun pae iz.har-e-dard-e-dil dekhun

huzur-e-yar majal-e-bayan rahe na rahe

‘amir’ jama hain ahbab dard-e-dil kah le

phir iltifat-e-dil-e-dostan rahe na rahe

Leave a Comment