Aur Kuchh Yaad Nahin Ab Se Na Tab Se Puchho

Anjum Irfani

aur kuchh yaad nahin ab se na tab se puchho

meri ankhon se lahu bahta hai kab se puchho

lamhe lamhe men hua jaata huun reza reza

vaj.h kuchh mujh se na puchho mire rab se puchho

vo to suraj hai har ik baat ka sho.ala hai javab

ru-ba-ru aa ke kaho ya ki aqab se puchho

yaad hai qissa-e-gham ka mujhe har lafz abhi

haal jis dard ka jis ranj ka jab se puchho

tai hava kaise andheron ke samundar ka safar

ghaza-e-sub.h se kya chadar-e-shab se puchho

zaḳhm dekho mire talvon ke na chehre ka ghubar

mujh pe kya guzri hai ye rah-e-talab se puchho

kitne sahra ki simaT aa.e hain siine men mire

tishnagi meri na sukhe hue lab se puchho

yuun na har chehre pe ab Daalo savali nazren

us ke kuche ka pata tum to na sab se puchho

mujh se kya puchhte ho saare hi lamhon ka hisab

mil ke jis moḌ se ham bichhḌe hain tab se puchho

harf-e-haq kahne men kya kya na hue ham pe sitam

puchhna hi hai to bu-jahl o lahb se puchho

jumbish-e-lab ki tumhen bhi hai ijazat ‘anjum’

baat jo puchho bahar-hal adab se puchho