Ahmad Rahi
aam hai kucha-o-bazar men sarkar ki baat
ab sar-e-rah bhi hoti hai sar-e-dar ki baat
ham jo karte hain kahin misr ke bazar ki baat
log pa lete hain yusuf ke kharidar ki baat
muddaton lab pe rahi nargis-e-bimar ki baat
kijiye ahl-e-chaman ab khalish-e-khar ki baat
ghunche dil-tang hava band nasheman viran
bais-e-marg hai mere liye gham-khvar ki baat
bu-e-gul le ke saba kunj-e-qafas tak pahunchi
laakh pardon men bhi phaili shab-e-gulzar ki baat
zindagi dard men duubi hui lai hai ‘rahi’
aise aalam men kise yaad rahe pyaar ki baat
Leave a Reply