jo zahir na ho vo latafat nahin hai
jo pinhan rahe vo sadaqat nahin hai
ye fitrat nahin hai mashiyyat nahin hai
koi aur shai hai ye ismat nahin hai
saba aur gulistan se daman kashida
nava-e-fusun-khez aur na-shunida
tajalli-e-rukhsar aur na-damida
koi aur shai hai ye ismat nahin hai
sar-e-rahguzar chhup-chhupa kar guzarna
khud apne hi jazbat ka khuun karna
hijabon men jiina hijabon men marna
koi aur shai hai ye ismat nahin hai
khayalat-e-paiham men har vaqt gum-sum
dil-e-narm-o-nazuk pe abr-e-tavahhum
bujha sa tabassum ghuta sa takallum
koi aur shai hai ye ismat nahin hai
vo ik kahish-e-talkh har aan dil men
vo sham-o-sahar ek khaljan dil men
umandta hua ek tufan dil men
koi aur shai hai ye ismat nahin hai
nigahon ki davat ko pamal karna
mazaq-e-latafat ko pamal karna
taqaza-e-fitrat ko pamal karna
koi aur shai hai ye ismat nahin hai
qasam anjum-e-shab ke zauq-e-safar ki
qasam tazgi-e-nasim-e-sahar ki
qasam asmanon ke shams-o-qamar ki
koi aur shai hai ye ismat nahin hai
qasam shokhi-e-ishq sanjogta ki
qasam june ke azm-e-sabr-azma ki
qasam tahira ki qasam khalida ki
koi aur shai hai ye ismat nahin hai
Leave a Reply