Sameer Kabeer
tamam ḳhvab adhure uTha ke rakkhe hain
kabhi to honge ye puure uTha ke rakkhe hain
tumhare naam ka paikar bana ke rakkha hai
tumhare naam ke chehre uTha ke rakkhe hain
ye kya ki chand to badal men ja ke baiTha hai
so ham ne jugnu sunahre uTha ke rakkhe hain
ye teri shoḳh ada.en hain aur miri larzish
ki jitne pahre the saare uTha ke rakkhe hain
hamen pata hai safar hai to dhuup bhi hogi
to ham ne peḌ ghanere uTha ke rakkhe hain
tumhari yaden tilismat hain nikalna kya
tumari yaad ke pahre uTha ke rakkhe hain
kashidgi ka ye aalam bhi biit ja.ega
hamare rishte hain gahre uTha ke rakkhe hain
Leave a Reply