Ek Qissa-E-Parina Dhundla Sa Hai Aaina

ik qissa-e-pārīna dhuñdlā sā hai ā.īna

ganjīna-e-gauhar hai yādoñ se bharā siina

kyuuñ aañkh churāte haiñ milte haiñ jo mahfil meñ

ik vaqt meñ apne the ye hamdam-e-dairīna

bahtā huā paanī bhī tham jaa.e na jumbish se

chheḌo na koī naġhma ḳhāmosh hai sāzīna

ik kun kī sadāoñ meñ mad.hosh ġham-e-hastī

ham-raqs mah-o-anjum chhalke haiñ mai-o-mīnā

āñkhoñ meñ liye vahshat sāhil se ulajhte haiñ

tūfānoñ kī chāhat meñ marnā bhī hai ab jiinā

ik qissa-e-pārīna hai dhund ke raste meñ

tā-hadd-e-nazar dekhūñ taḳhlīq kā ā.īna

Leave a Comment