maut se ziist ki takmil nahin ho sakti
raushni ḳhaak men tahlil nahin ho sakti
mom ho ja.un ki patthar se ḳhuda ho ja.un
kisi surat miri takmil nahin ho sakti
kis liye saans ki zanjir se bandha hai mujhe
aur kuchh surat-e-tazlil nahin ho sakti
kis liye zinda huun main kis ke liye zinda huun
jurm aisa hai ki tavil nahin ho sakti
in andheron men lahu-rang saveron ki ‘najib’
kya firozan koi qindil nahin ho sakti
Leave a Reply