hai dil ko mere ariz-e-janan se irtibat
bulbul ko jis tarah ho gulistan se irtibat
mujh dard-mand-e-ishq ki tadbir hai abas
hoga na mere dard ko darman se irtibat
banda huun ishq ka nahin mazhab se mujh ko kaam
kyunkar karun main gabru musalman se irtibat
hai rabt mujh ko kucha-e-janan se roz-o-shab
majnun ko jis tarah tha bayaban se irtibat
mazhab hai mera ishq aur rindi hai mera kaam
hai kufr se na mujh ko na iman se irtibat
hai rabt mujh ko qamat-e-janan se jis tarah
qumri ka hove sarv-e-gulistan se irtibat
‘asim’ jahan men shah-e-khadim ke main siva
kafir huun gar karun kisi insan se irtibat
Leave a Reply