Jigar Barelvi
jhalak parde se yuun rah rah ke dikhlane se kya hasil
ye ThanDi garmiyan bhi darmiyan laane se kya hasil
rahe jab ḳhaak pa-e-sham.a par jal kar to jalna hai
nahin girya to parvanon ke jal jaane se kya hasil
abad tak saans lene aur gham sahne men lazzat hai
dayar-e-ishq men ghabra ke mar jaane se kya hasil
nahin hota hai koi kaam hargiz vaqt se pahle
umid-o-arzu men dil ko taḌpane se kya hasil
na yuun TuTin na TuTengi kabhi zindan ki divaren
koi sar phoḌ kar mar jaa.e mar jaane se kya hasil
taras aaya hai zalim ko na aa.e kam-nasibon par
taras hi aa gaya jab to sitam Dhane se kya hasil
agar mai-ḳhvar ik ik buund ko saaqi taras jaa.en
tire jam-o-subu se tere maiḳhane se kya hasil
mohabbat ka kahin daman bhara hai bhiik mange se
tumhin kah do hamare haat phailane se kya hasil
abhi baaqi hai ik ummid-e-marg-e-na-gahan lekin
usi zindan men phir aa.e to mar jaane se kya hasil
usi ke tevaron ko dekhti rahti hain taqdiren
dil-e-rahat-talab bechain ho jaane se kya hasil
‘jigar’ apne liye jiina koi jiine men jiina hai
na kaam aa.en kisi ke to jiye jaane se kya hasil
‘jigar’ hai zindagi jab tak ki garmi hai mohabbat ki
hua jab sard siina to jiye jaane se kya hasil
Leave a Reply