Thukrae Hue Dil Ki Yaad Aai to Kya Aai

Nushur Wahidi

Thukra.e hue dil ki yaad aa.i to kya aa.i

phenka hua shisha tha TuuTa to sada aa.i

din zauq-e-navazish se begana sahi lekin

jalva hai na sho.ala hai raat aa.i to kya aa.i

ishrat-gah-e-batil ki raunaq men kami kya hai

gar bad-e-saba ja kar ik sham.a bujha aa.i

baḌhti hui betabi kuchh ruuTh ga.i shayad

jhaTke hue daman se hathon ko haya aa.i

uThta hai qadam lekin raftar ghunuda hai

niind aa ga.i raston ko manzil ki hava aa.i

hai kuchh to ‘nushur’ ehsan is umr-e-ravan ka bhi

ik roz kinare par kashti to laga aa.i