malte hain hath, haath lagenge anaar kab
joban ka un ke dekhiye hoga ubhar kab
ushshaq muntazir hain qayamat kab aaegi
be-parda munh dikhaega vo parda-dar kab
ik roz apni jaan pe ham khel jaenge
tum puchhte rahoge yunhi baar baar kab
bekas ko kaun roe gharibon ka kaun hai
meri lahad pe shama hui ashk-bar kab
kaun aaya padhte fatiha kis ne chadhae phuul
marne ke baad puchhta hai koi yaar kab
ummid na-umid ko un se nahin rahi
dushman ke dost hain vo hue mere yaar kab
jo unche unche hain vahi jaate hain baam par
mahfil men ham gharibon ko milta hai yaar kab
jab naqd maal tu ne diya ham ne naqd-e-dil
saaqi hamen bata de ki pi thi udhar kab
milna chhudaya tum se mira rashk-e-ghair ne
karta hai koi aap se jabr ikhtiyar kab
‘agha’ ko zabh karte ho apni gali men kyuun
jaaez hai meri jaan haram men shikar kab
Leave a Reply