Is Daur Ki Palkon Pe Hain Aansu Ki Tarah Hum

Qaisarul Jafri

is daur ki palkon pe hain aansu ki tarah ham

kuchh der men uḌ ja.enge ḳhushbu ki tarah ham

baḌh kar kisi daman ne bhi ham ko na sambhala

ankhon se Tapakte rahe aansu ki tarah ham

kis phuul se bichhḌe hain ki phirte hain pareshan

jangal men bhaTakti hui ḳhushbu ki tarah ham

ab din ke ujale men hamen kaun pukare

chamke the kabhi raat men jugnu ki tarah ham

har moḌ pe aa.iin tire daman ki hava.en

har chhanv ko samjhe tire gesu ki tarah ham

‘qaisar’ hamen duniya ne samajh kar bhi na samjha

uljhe hi rahe kakul-e-urdu ki tarah ham