Jan Kashmiri
tufan se Takrana us ka to vatira hai
dil ashkon ke qulzum men chhoTa sa jazira hai
ehsas nazakat ki kyon maut na vaaq.e ho
har phuul ke angan men kanTon ka zaḳhira hai
darzon ki latafat men ḳhushbu ne amaan paa.i
gul chirne vaale ne kis shaan se chira hai
munh-zor ujale se behtar thi shab-e-tira
ab dil bhi pareshan hai aur aankh bhi ḳhira hai
har phuul ki surat men shaḳhon pe jama ḳhuun hai
ye sahn-e-chaman kya hai zaḳhmon ka zaḳhira hai
mahtab se chehron ke be-sud nazare hain
jab qalb ki duniya men chha.i shab-e-tira hai
alfaz ke teshe se ai ‘jan’ tarash us ko
patthar ke libade men poshida jo hiira hai
Leave a Reply