ghar ke darvaze khule hon chor ka khaTka na ho
be-sar-o-saman koi shahr men aisa na ho
tirgi ke ghaar se bahar nikal kar bhi to dekh
us zamin ki kokh se suraj koi nikla na ho
main ki goya bhi na ho paaya kisi divar se
rah gaya chup soch kar shayad koi sunta na ho
dasht men jaane se pahle apne dil men jhank lo
ḳhub-surat jism ke andar koi koi sahra na ho
ehtiyatan dekh hi lo dam-ba-ḳhud kyuun rah ga.e
tum jise divar samjhe ho vo darvaza na ho
main ki duniya ki har ik shai men hua huun ashkar
dekh tere aa.ine men bhi mira chehra na ho
moḌ hain har har qadam par kis se puchhen rasta
phir raha huun shahr men jaise koi divana ho
ye akela-pan to ‘shahid’ shahr ka ashob hai
ya koi tanha na ho ya har jagah virana ho
Leave a Reply