makin yahin ka hai lekin makan se bahar hai
abhi vo shaḳhs miri dastan se bahar hai
utar bhi sakta hai sartan ki tarah mujh men
vo ishq jo mire vahm-o-guman se bahar hai
saval ye nahin mujh se hai kyuun gurezan vo
saval ye hai ki kyuun jism o jaan se bahar hai
na jaane kaise tarazu hua mire dil men
vo ek tiir jo teri kaman se bahar hai
mire vajud ka a.ina puchhta hai mujhe
ye aks kab se tire ḳhak-dan se bahar hai
ḳhuda-gavah vo is darja ḳhub-surat thi
ki mera shauq-e-tamasha bayan se bahar hai
hamari jeb men ḳhvabon ki rezgari hai
so len-den hamara dukan se bahar hai
mira amiin koi tha to vo mira ham-zad
aur ab vahi mire pasmandgan se bahar hai
‘hasan’ men hiddat-e-hijran se jal bhi sakta huun
ki mera jism tire sa.eban se bahar hai
Leave a Reply