vo mire siine se aḳhir aa laga
mar na ja.un main kahin aisa laga
ret maazi ki miri ankhon men thi
sabz jangal bhi mujhe sahra laga
kho rahe hain rang tere honT ke
ham-nashin in pe mira bosa laga
lahr ik nikli miri pahchan ki
Dubte ke haath men tinka laga
kar raha tha vo mujhe gumrah kya
har qadam pe rasta muḌta laga
kuchh nahin chhoḌo nahin kuchh bhi nahin
ye na.e andaz ka shikva laga
gend balle par kabhi baiThi nahin
har dafa.a mujh se faqat kona laga
duur jaate vaqt bas itna kaha
saath ‘kanha’ aap ka achchha laga
Leave a Reply