Sher Singh Naaz Dehlvi
baton men DhunDte hain vo pahlu malal ka
matlab ye hai ki zikr na aa.e visal ka
kya zikr un se kijiye dil ke malal ka
hai ḳhamushi javab mire har saval ka
ta umr phir na talib-e-jalva hue kalim
dekha jo ek baar karishma jamal ka
ruḳh par paḌi hui hai naqab-e-shua-e-husn
mauqa.a nazar ko ḳhaak mile dekh-bhal ka
ham na-murad-e-ishq vo hijran-nasib hain
dekha na ham ne munh kabhi sham-e-visal ka
bud-o-nabud kahte hain ahl-e-jahan jise
adna sa sho.abada hai tilism-e-ḳhayal ka
Leave a Reply