tu bhi fariyadi hua tha iltija main ne bhi ki
tu na tha mujrim akela haan ḳhata main ne bhi ki
zulm donon ne kiya tha donon the is men sharik
ibtida gar tu ne ki to intiha main ne bhi ki
sirf tu ne hi nahin ki justuju-e-chara-gar
dard jab had se baḌha to kuchh dava main ne bhi ki
kis ne kya manga falak se aur kis ko kya mila
haath tu ne bhi uTha.e the dua main ne bhi ki
main tira hissa na ban paaya ye achchha hi hua
go ye ḳhvahish ai hujum-e-dil-ruba main ne bhi ki
sabza-e-begana se rishta mira kuchh kam nahin
is chaman ki abyari ai ghaTa main ne bhi ki
Leave a Reply