Rehman Faris
sar-ba-sar yaar ki marzi pe fida ho jaana
kya ghazab kaam hai razi-ba-raza ho jaana
band ankho vo chale aa.en to va ho jaana
aur yuun phuuT ke rona ki fana ho jaana
ishq men kaam nahin zor-zabardasti ka
jab bhi tum chaho juda hona juda ho jaana
teri janib hai ba-tadrij taraqqi meri
mere hone ki hai me.araj tira ho jaana
tere aane ki basharat ke siva kuchh bhi nahin
baagh men sukhe daraḳhton ka hara ho jaana
ik nishani hai kisi shahr ki barbadi ki
narava baat ka yak-laḳht rava ho jaana
tang aa ja.un mohabbat se to gaahe gaahe
achchha lagta hai mujhe tera ḳhafa ho jaana
si diye jaa.en mire honT to ai jan-e-ghazal
aisa karna miri ankhon se ada ho jaana
be-niyazi bhi vahi aur ta.alluq bhi vahi
tumhen aata hai mohabbat men ḳhuda ho jaana
azhdaha ban ke rag-o-pai ko jakaḌ leta hai
itna asan nahin gham se riha ho jaana
achchhe achchhon pe bure din hain lihaza ‘faris’
achchhe hone se to achchha hai bura ho jaana
Leave a Reply