har chiiz hai mahv-e-khud-numai
har zarra shahid-e-kibriyai
be-zauq-e-numud zindagi maut
tamir-e-khudi men hai khudai
raai zor-e-khudi se parbat
parbat zof-e-khudi se raai
taare avara o kam-amez
taqdir-e-vajud hai judai
ye pichhle pahar ka zard-ru chand
be-raz o niyaz-e-ashnai
teri qindil hai tira dil
tu aap hai apni raushnai
ik tu hai ki haq hai is jahan men
baaqi hai numud-e-simyai
hain uqda-kusha ye khar-e-sahra
kam kar gila-e-barhana-pai
Leave a Reply