khuli faza ka ubharta nahin saman ghar men
nahin banate parinde ab ashiyan ghar men
jo chal rahi thiin to dahka kiye dar-o-divar
rukin hava.en to bharne laga dhuan ghar men
saje hain farsh lahu se to dar azabon se
ugi hain saḳht zaminon ki khetiyan ghar men
sukun ki shakl ho paida koi to kaise ho
yaqin hai sarhad-e-jan se pare guman ghar men
ajiib taur se badle hain mausamon ne chalan
bahar dasht men rahti hai aur ḳhizan ghar men
ulaT ga.e hain qarabat ke zabte saare
saba.en qabr pe chalti hain andhiyan ghar men
use hi maan liya ham ne baḳht ka maava
baja raha tha jo aaseb siTiyan ghar men
nahin vo aankh ki ham dushmanon ko pahchanen
daba.e baiThe hain apnon ki haDDiyan ghar men
ibadaton ne bhi DhunDe hain ab na.e maskan
namaz hone lagi dasht men azaan ghar men
uTha ke sar kabhi nikle to ye na yaad raha
ki chhoḌ aa.e hain aaba ki pagḌiyan ghar men
mila hai baaz adalat ka dar pe kya kiije
paḌi hai ḳhauf se sahmi hui zaban ghar men
subut-e-be-gahni rah gaya ḳhayalon men
rakha safa.i ka yaron ne har bayan ghar men
hai ‘arsh’ aaj to fitrat bhi ham-rakab-e-qaza
ghaTa.en auj-e-falak par hain bijliyan ghar men
Leave a Reply