baḳhshi hai kaif-e-ishq ne vo be-ḳhudi mujhe
main zindagi ko bhuul gaya zindagi mujhe
daur-e-falak pe jab kabhi aa.i hansi mujhe
alam-e-rozgar ne avaz di mujhe
tere ḳhayal se hai vo dil-bastagi mujhe
hasrat hi ab nahin tire didar ki mujhe
ai marg-e-ishq teri navazish ka shukriya
duniya ki talḳhiyon se faraghat mili mujhe
har shai se be-niyaz hai mera dil-e-hazin
tum kya mile ki mil ga.e kaunain bhi mujhe
kal tak jo tegh tishna-e-ḳhun-e-adu rahi
aaj us ki pyaas ḳhud hi bujhani paḌi mujhe
faizan-e-varsi se ‘aziz’-e-jahan huun main
sab kuchh hai ek silsila-e-varsi mujhe
Leave a Reply