jab se dil men tire baḳhshe hue gham Thahre hain
mahram aur bhi apne liye ham Thahre hain
gham ki har daur men Thahra.e ga.e hasil-e-zist
aur is daur men ham sahab-e-gham Thahre hain
ham tiri raah men uTThe hain baḌe azm ke saath
gardish-e-dahr bhi Thahri hai jo ham Thahre hain
shauq-e-avargi-o-shauq talab ke qurban
uTh ga.e hain to kahan apne qadam Thahre hain
main tasavvur se kabhi jin ke laraz uThta tha
vahi halat mohabbat ka bharam Thahre hain
maghfirat hi sahi mai-ḳhana-o-mai ke ma.ani
ki yahan aaj safiran-e-haram Thahre hain
sirf ankhon hi men kam ruk na sake meri ‘ra.is’
mere aansu kisi daman men bhi kam Thahre hain
Leave a Reply