Shaheen Abbas
ankhon se yuun charaghon men Daali hai raushni
ham jaisi chahte the bana li hai raushni
dariya ghurub hone chala tha ki aaj raat
gharqab kashtiyon ne uchhali hai raushni
apni nashist chhoḌ ke vaan rakh diya charagh
main ne zamin de ke bacha li hai raushni
hathon ka imtihan liya saari saari raat
sanche men sub.h-o-sham ke Dhali hai raushni
main ne kanar-e-sham guzari hai ek umr
main janta huun Dubne vaali hai raushni
kya raakh gir rahi hai nazar ki munDer se
ḳhali diya hai aur ḳhayali hai raushni
is baar tere ḳhvab men rakkha hai apna ḳhvab
is baar raushni men sambhali hai raushni
Leave a Reply