ham jo kabhi kabhi hote hain
aur akasr nahin hote
khvab ki aulad hain
takmil ik sahra ka naam hai
jis ke safar ke liye
jitni naslon ki umr chahe
utni naslen abhi paida nahin huiin
aur vo jo mere sahra ka sarab tha
main ne apne apne zinda lamhon ko
us ke naam kar diya
vo kaun tha
vo marte hue mazduron ki umang nahin tha
aur vo gharib talib-e-ilm ki vo fees nahin tha
jo ek ek paise se mil kar banti hai
aur vo kunvari beti ka vo jahez bhi nahin tha
jo khushi ke mazbut taale ki iklauti kunji ban jaata
vo kaun tha
vo tanhai se mazid tanhai tak safar ka vo darmiyan tha
jo sirf bahrup hota hai
khvab ne bahrup se shadi kar li
aur main ne apne zinda lamhon ko
bahrup ke naam kar diya
jis ka naam khud-farebi hai
ruup aur bahrup ke darmiyan bahti hai
vo jo dhund ki lakir ke us paar
bahrup ki duniya men chala gaya
laut kar na aaya
aur main ne laut kar na aane valon ke naam
asl ke zamane kar diye
asl ke zamane
laut kar na aane valon ke saath
dhund ke us paar chale gae
ye dil vo muusa hai
jo aag lene gaya aur use sirf aag hi mili
angaron ko thaam kar
muusa ne apne haath jala liye
aur zindagi ke rang ne
jale hue hathon par chadhne se inkar kar diya
main takmil ke sahra men bhatakta hua zarra huun
suraj hone ke guman se duur
aur bache hue lamhon ko god men liye zindagi
har raegan subh ki chita par
sati ho jaane vaali beva hai
Leave a Reply