har-chand ki dekhe hai vo pyaar ki ankhon se
par nikle hai be-rangi us paar ki ankhon se
shiddat se laga hansne ahval pe gar mere
aansu bhi kabhi tapke makkar ki ankhon se
be-taqati-e-dil ka kya sharh-o-bayan kijiye
bimari numayan hai bimar ki ankhon se
hai tegh-e-nigah khinche shamshir-ba-kaf mizhgan
ab jiite nahin bachte khun-khar ki ankhon se
lakhon hi ki ankhon se ankhon tiri behtar hain
kya achchhi hain ai pyase vo chaar ki ankhon se
mat ahl-e-dilon se kar ham-chashmi ai aine
ghafil na mila ankhen bedar ki ankhon se
har tarah se dekha vo dekh hi leta hai
tayyari kare kya koi ayyar ki ankhon se
itni bhi rasai ho ‘joshish’ to ghanimat hai
khak-e-kaf-e-pa maliye dil-dar ki ankhon se
Leave a Reply