duudh jaisa jhaag lahren ret aur ye sipiyan
jin ko chunti phir rahi hain motiyon si laḌkiyan
baagh men bachchon ke gird-o-pesh yuun uḌti phiren
jaise qatil apna apna DhunDhti huun titliyan
vo mujhe ḳhushiyan na de aur meri ankhen nam na hon
hai ye paiman zindagi ke aur mere darmiyan
bam-o-dar un ke hava kis pyaar se chhuti rahi
chandni ki god men jab so rahi thiin bastiyan
kal yahi bachche samundar ko muqabil pa.enge
aaj tairate hain jo kaghaz ki nannhi kashtiyan
ghumna pahron ghane mahke hue ban men ‘kamal’
vapsi men dekhna apne hi qadmon ke nishan
Leave a Reply