Pinhaan
zindagi teri inayat bhi ghazab hoti hai
ishq ho jaa.e to halat hi ajab hoti hai
bas mohabbat bhi hai dagh-e-kaf-e-musa ki tarah
mo.ajize kya nahin hote hain ye jab hoti hai
ai mire dil mujhe ye aas dila.e rakhna
ik nazar lutf ki ab hoti hai ab hoti hai
ye ghanimat hai ki hai naghma-e-soz-e-hasti
zindagi yuun bhi kahan raqs-e-tarab hoti hai
ruuh dar-asl mohabbat ke siva kuchh bhi nahin
dam men dam dil men ye dhaḌkan ka sabab hoti hai
tishnagi had se guzar jaa.e na ba.ad-e-taskin
aur mil jaa.e to phir aur talab hoti hai
be-ḳhudi sa koi aalam hai ḳhudi par taari
kaifiyat aisi ḳhabar kya mujhe kab hoti hai
dil chura le jo use kahti hai jaan bhi de do
ye mohabbat bhi tabi.at ki ajab hoti hai
mere bas men to faqat mashq-e-suḳhan hai ‘pinhan’
ḳhud ghazal chahe ki ho jaa.e ye tab hoti hai
Leave a Reply