ab koi raah bhi asan nahin dekhne men
dekhte rahte hain aur dhyan nahin dekhne men
kitni viran nazar aati hai ta-hadd-e-nazar
yahi duniya ki jo viran nahin dekhne men
ḳhali tanha.i ḳhazanon se bhari rahti hai
aur yahan koi bhi saman nahin dekhne men
in dinon fursat-e-tabir kahan mumkin hai
in dinon ḳhvab bhi asan nahin dekhne men
vaise to hijr men us ko bhi nahin koi malal
vaise to main bhi pareshan nahin dekhne men
saare kamron men koi ret uḌati hai mujhe
ye mira ghar ki bayaban nahin dekhne men
ik nazar su-e-malamat bhi agar dekha karen
main samajhta huun ki nuqsan nahin dekhne men
us jagah bhi koi imkan nikal aata hai
jis jagah koi bhi imkan nahin dekhne men
itna hairan raha huun to bana huun aisa
main vo ik shaḳhs ki hairan nahin dekhne men
Leave a Reply