Poet
main jin ko DhunDne nikla tha gahre gharon men
pata chala ki vo rahte hain ab sitaron men
parakh raha hai mujhe jo vo is ḳhayal ka hai
hamesha jhuuT nahin hota ishtiharon men
unhen yaqin tha duniya ki umr lambi hai
jo log peḌ lagate the rahguzaron men
main ḳhud ko dekhun agar dusre ki ankhon se
milengi ḳhamiyan apne hi shah-karon men
tumhari ḳhushbu ko mujh se kahin ye chhin na le
hava jo rahti hai divar ki dararon men
ḳhuda ka shukr ki main us se thoḌi duur raha
safed saanp tha gende ke piile haron men
nashili raat ka nashsha kuchh aur baḌh jaata
tira nazara bhi hota agar nazaron men
zaban pe aa.i to apni miThas kho baiThi
jo baat hoti thi pahle kabhi isharon men
Leave a Reply