mujhe kal achanak ḳhayal aa gaya asman kho na jaa.e
samundar ko sar karte karte kahin badban kho na jaa.e
koi na-muradi ki yalghar siine ko chhalni na kar de
kahin dasht-e-anfas men sabr ka karvan kho na jaa.e
ye hansta hua shor sanjidgi ke liye imtihan hai
so mohtat rahna ki tahzib-e-ah-o-fughan kho na jaa.e
ise vaqt ka jabr kahiye ki bechargi jism o jaan ki
makan khone valon ko Dar hai ki ab la-makan kho na jaa.e
main apne iradon ki gaThri uTha.e kahin ja na paaya
hamesha ye dhaḌka raha mahfil-e-dostan kho na jaa.e
ye qisson ki rim-jhim men bhiga hua halqa-e-guftugu hai
yahan chup hi rahna ki tasir-e-lafz-o-bayan kho na jaa.e
yahan kis ko fursat ki aghaz o anjam ko yaad rakkhe
sabhi ko ye tashvish hai vaqt ka darmiyan kho na jaa.e
ye bazar-e-naf.a-o-zarar hai yahan be-tavazun na hona
sameTo agar suud to dhyan rakhna ziyan kho na jaa.e
uTho ‘azm’ is atish-e-shauq ko sard hone se roko
agar ruk na paa.e to koshish ye karna dhuan kho na jaa.e
Leave a Reply