yaad aati rahi bhula na sake
sham.a jalti rahi bujha na sake
chand-tare gul-o-chaman mil kar
dil ki ik dastan suna na sake
aas bandhi thi jin sitaron se
der tak vo bhi jagmaga na sake
naghma kya mutriban-e-ahd-e-jadid
taar TuuTe hue mila na sake
aaj vo rahbar-e-ḳhala.iq hain
ḳhud ko jo aadmi bana na sake
panja-e-gul se bhi ye matvale
daman-e-zindagi chhuḌa na sake
gham ke maare hue qulub ‘nushur’
dard ki sarhadon ko pa na sake
Leave a Reply