Tilok Chand Mahroom
zahe qismat agar tum ko hamara dil pasand aaya
magar ye daagh kyuun kar ai mah-e-kamil pasand aaya
kiya hai qatl lekin dekhiye jaan kab nikalti hai
ki un ko raqs-e-betabana-e-bismil pasand aaya
vo momin bhi hai mangega dua sidq-e-tanasuḳh ki
tire hathon se marna jis ko ai qatil pasand aaya
na puchho kab se main shamil hua huun tira-baḳhton men
kisi ke ariz-e-raushan ka jab se til pasand aaya
ye gustaḳhi hai ai ‘mahrum’ apni had se baḌhta hai
ki ta-hadd-e-zamin-e-ghalib-e-mushkil-pasand aaya
Leave a Reply