Hajra Noor Zaryab
zindagi ke liye itna bhi kya hairan hona
mujh ko aata nahin be-vaj.h pareshan hona
mangna jo bhi ho mangungi main apne rab se
maang kar bande se aaya na pasheman hona
yuun to guftar men mahir hain bahut se lekin
itna asan nahin sachcha.i pe qurban hona
mujh se ulfat hai to bas mere hi ban kar rahna
bhuul kar bhi na kabhi ghair ke mehman hona
har ghaḌi tirgi rahti hai musallat mujh par
main ne dekha hi nahin dil ka daraḳhshan hona
daur-e-hazir ko lagi kis ki nazar-bad ‘zaryab’
aadmi ko bhi mayassar nahin insan hona
Leave a Reply