Ye Ajab Rasta Hai Jis Pe Lagaya Hai Mujhe

Jameel Yusuf

ye ajab rasta hai jis pe lagaya hai mujhe

mahv-e-hairat huun ki kya chiiz banaya hai mujhe

teri duuri bhi hai mushkil tiri qurbat bhi muhal

kis qadar tu ne miri jaan sataya hai mujhe

tu kisi phuul kisi aankh ke parde men raha

tu ne kab apna hasin chehra dikhaya hai mujhe

mere firdaus ki nahren miri ḳhatir hain to kyuun

pyaas ke dasht men hairan phiraya hai mujhe

saari maḳhluq se taqvim men ahsan huun main

aur phir aag ka indhan bhi banaya hai mujhe

apni taḳhrib pe nadim huun na ta.amir pe ḳhush

tu ne Dhaya hai mujhe tu ne banaya hai mujhe