mujh se kaha jibril-e-junun ne ye bhi vahi-e-ilahi hai
mazhab to bas mazhab-e-dil hai baaqi sab gumrahi hai
vo jo hue firdaus-badar taqsir thi vo aadam ki magar
mera azab-e-dar-badri meri na-karda-gunahi hai
sang to koi badh ke uthao shakh-e-samar kuchh duur nahin
jis ko bulandi samjhe ho un hathon ki kotahi hai
phir koi manzar phir vahi gardish kya kiije ai ku-e-nigar
mere liye zanjir-e-gulu meri avara-nigahi hai
bahr-e-khuda khamosh raho bas dekhte jaao ahl-e-nazar
kya laghzida-qadam hain us ke kya duzdida-nigahi hai
diid ke qabil hai to sahi ‘majruh’ tiri mastana-ravi
gard-e-hava hai rakht-e-safar raste ka shajar ham-rahi hai