aks ghaTte baḌhte hain shishagari hai ek si
soch ke adse juda hain raushni hai ek si
zindagi karte hain insan muḳhtalif andaz men
go ki sab ki dastaras men zindagi hai ek si
doston aur dushmanon men kis tarah tafriq ho
doston aur dushmanon ki be-ruḳhi hai ek si
soch ka mafluj hona sanehe se kam nahin
an-ginat sha.er hain lekin sha.eri hai ek si
sab dilon men ja-guzin hain gham ke qisse ek se
sab jabinon par raqam be-raunaqi hai ek si
‘jan’ ye sabit hua hai tajrabe ki aanch par
dushmani hai sau tarah ki dosti hai ek si
Leave a Reply