Basheer Dada
mire dil-gulsitan ko kis liye abad karna tha
agar us ko mire haq se mujhe azad karna tha
miri sansen mire ghuT ghuT ke mar jaane pe chalti hain
use shayad mujhe minnat-kash-e-fariyad karna tha
mujhe ik ajnabi ne Dubne se kyuun bachaya tha
main ab samjha use ḳhud hi mujhe barbad karna tha
vo mahbuba to ik shoa.la-fishan hai phul-qalib men
ḳhuda ko asl men ham par sitam ijad karna tha
shab-e-hijran ne kaisi uljhanon men mujh ko uljhaya
ki jis ko bhuul jaana tha usi ko yaad karna tha
Leave a Reply