Figar Unnavi
jafa-e-yar ko ham lutf-e-yar kahte hain
ḳhizan ko apni zaban men bahar kahte hain
vo ek sunte nahin ham hazar kahte hain
magar fasana bahar-e’tibar kahte hain
zamana qaid ko samjhe hue hai azadi
kisi ke jabr ko ham iḳhtiyar kahte hain
qafas men rah ke mujhe ye bhi imtiyaz nahin
kise ḳhizan kise fasl-e-bahar kahte hain
nafas nafas jo payam-e-hayat deti hai
usi nazar ko taghaful-shi.ar kahte hain
tumhare husn ki jis dil ko raushni na mile
ham aise dil ko charagh-e-mazar kahte hain
tiri nigah-e-taghaful se dil ne paaya hai
vo ek kaif jise intizar kahte hain
mohabbat aur mohabbat men arzu-e-visal
ham is bahar ko nang-e-bahar kahte hain
ḳhadang-e-naz abhi hai tumhari chuTki men
na jaane log mujhe kyuun ‘figar’ kahte hain
Leave a Reply