Hanif Fauq
miri hayat agar muzhda-e-sahar bhi nahin
sitam ye hai ki tire gham ki rahguzar bhi nahin
chaman men hon men pareshan misl-e-mauj-e-nasim
chaTak ke ghunche kahenge hamen ḳhabar bhi nahin
nishat-o-kaif ke lamhon zara Thahar jaao
bahar raah men hai duur ka safar bhi nahin
main teri jumbish-e-mizhgan se kaanp jaata hon
agarche dil ko gham-e-do-jahan se Dar bhi nahin
fareb-e-va.ada pe ham ta-abad ji.en lekin
hazar haif ye imkan umr bhar bhi nahin
koi to hamdam-e-derina de sada is dam
vo ajnabi hon ki manus apna ghar bhi nahin
nasim sar-ba-gareban saba hai sar-gardan
vo vaqt hai koi ḳhushbu ka rahbar bhi nahin
zamin par hi kahin nuur ka suragh lagao
sitare Duub ga.e charḳh par qamar bhi nahin
kaTi hai ankhon hi ankhon men sham-e-hijr magar
shab-e-daraz-e-alam itni muḳhtasar bhi nahin
kisi ki narm-nigahi ki aanch hai varna
ye dil-pazir nava jalva-e-hunar bhi nahin
hava-e-sham se kitne charagh jal uTThe
dayar-e-dil men tamanna ka ik sharar bhi nahin
na jaane kyuun dar-e-zindan bhi kaanp uThta hai
sada-e-‘fauq’ agar aisi kargar bhi nahin
Leave a Reply